Patrimonio
Historia e contorna
Mil anos de historia caben nun paseo curto. Desde as casas, o mosteiro, a vila medieval e os castros celtas están a un paso — e a comarca enteira convida a seguir camiñando.
Claustro do Mosteiro de San Salvador, fundado no ano 936
Torre de Vilanova dos Infantes, do século X
Celanova
O Mosteiro de San Salvador fundouno San Rosendo no ano 936, sobre terras do seu irmán o conde Froila Gutiérrez. Co tempo chegou a ter máis de oitenta abadías dependentes del, un dos conxuntos monásticos máis importantes de Galicia. A súa igrexa, de planta de cruz latina e tres naves, rematouse en 1653 da man do mestre Melchor de Velasco. Xunto ao claustro agóchase a pequena Capela de San Miguel, unha das construcións mozárabes mellor conservadas de toda a península.
Tras a desamortización do século XIX o edificio quedou baleiro, ata que unha restauración —premiada co Europa Nostra— lle devolveu a vida: hoxe conviven alí o concello, a biblioteca, un instituto e a oficina de turismo. Pódese visitar o claustro e a igrexa por unha entrada simbólica de 2€, e a capela de San Miguel merece por si soa a parada. Todo, a dous minutos andando das casas.
Vilanova dos Infantes
A poucos minutos de Celanova, esta parroquia conserva un trazado medieval case intacto arredor da súa torre, levantada no século X sobre os restos dun antigo castro. Pertenceu primeiro aos monxes de Celanova e máis tarde a distintas casas nobres, e foi unha das grandes fortalezas de Galicia: sufriu o ataque da revolta irmandiña en 1467, quedou parcialmente destruída e reconstruíuse pouco despois.
A comezos do século XIX a torre pasou a acoller o concello local, e dende o ano 2000 alberga un pequeno centro de interpretación da comarca de As Terras de Celanova. Dezanove metros de pedra, hórreos centenarios arredor e rúas que aínda seguen o trazado de hai séculos: unha parada curta que merece bastante máis que unha foto rápida.
A comarca e máis alá
Que ver e que facer
Desde as casas, todo o demais queda preto: castros, ríos, encoros, augas termais e algúns dos recunchos máis singulares de Galicia.
Castro de Castromao
A dous quilómetros de Celanova, un poboado celta ocupado desde o século V a.C. ata o II d.C., con vistas amplas sobre o val do río Arnoia.
Termas de Lobios
Na Baixa Limia, augas termais xunto ao río Caldo dentro do Parque Natural Baixa Limia-Serra do Xurés. Ideal para unha tarde de descanso.
Encoro das Conchas
Un gran encoro entre Bande e Muíños con praias fluviais, piragüismo e, cando o nivel da auga o permite, restos duns termas romanas.
Ribeira Sacra e Cañón do Sil
Canóns de ata 500 metros de profundidade e máis de corenta mosteiros, entre eles San Pedro de Rocas, ligado a Celanova desde o século X.
Río Arnoia
Rutas sinalizadas xunto ao río, antigos muíños de auga e pozas naturais para bañarse nos meses de calor.
Gastronomía local
Polbo á feira, viño da Ribeira Sacra e castañas de tempada. Descóbrea en detalle →